काठमाडौँ । नेकपा एमालेले पार्टीका स्थानीय तथा प्रदेश तहका जनप्रतिनिधिलाई एमाले नत्याग्न र माधव नेपालको पार्टी नरोज्न निर्देशन गरेको छ । पार्टी अध्यक्ष केपी ओलीले अन्तर पार्टी निर्देशन जारी गर्दै दल विभाजनको पक्षमा नउभिन निर्देशन गरेका हुन् ।

मेरोन्यूजले प्राप्त गरेको ओलीको अन्तर पार्टी निर्देशिका (अपानी) भदौं ९ मा जारी गरिएको हो । सरकारले दल विभाजन सम्बन्धी अध्यादेश जारी गरेपछि माधव नेपालले एमाले छोडेर नेकपा एकीकृत समाजवादी पार्टी गठन गरेका छन् । निर्वाचन आयोगबाट नेपालको पार्टीले दलको मान्यता प्राप्त गरिसकेको छ ।

आयोगले अध्यादेशकै जगमा टेकर स्थानीय तह र प्रदेश तहका निर्वाचित जनप्रतिनिधिलाई भदौं २२ भित्र दल रोजिसक्न सूचना जारी गरेको छ । आफै उपस्थित भएर सनाखतका लागि आउन आयोगले सूचना जारी गरिसकेको सन्दर्भमा ओलीले त्यसरी एमाले छोडेर माधव नेपालको पार्टी नरोज्न आग्रहसहित निर्देशन जारी गरेका हुन् ।

स्थायी कमिटी र केन्द्रीय कमिटी बैठकका निर्णय कार्यान्वयन गराउन जारी गरिएको अन्तर पार्टी निर्देशनमा विभाजन नरोज्न निर्देशन गरिएको हो ।

‘पार्टी विभाजनको दुराशयबाट साथ हालै जारी अध्यादेशमा स्थानीय तहका जनप्रतिनिधिहरूले समेत दल त्याग गर्नसक्ने प्रावधान राखिएको छ । अध्यादेशको उक्त प्रावधान संविधानको अक्षर र भावनाविपरीत रहेको निष्कर्षसहित बैठकले उक्त व्यवस्थाको कानुनी प्रतिवाद गर्ने निर्णय गरेको छ ।’ ओलीको निर्देशनमा भनिएको छ ।

हेर्नुहोस ओलीले जारी गरेको अन्तरपार्टी निर्देशन