काठमाडौँ । मन्त्री मण्डल विस्तार गर्नेबारे प्रधानमन्त्री निवास बालुवाटारमा सत्ता गठबन्धन पक्षको बैठक सुरु भएको छ । सत्तारूढ गठबन्धनका शीर्ष नेताहरू मन्त्री मण्डल विस्तार गर्न छलफलका लागि बैठकमा बसेका हुन् ।

बैठकमा प्रधानमन्त्री तथा नेपाली कांग्रेसका सभापति शेरबहादुर देउवा, नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’, नेकपा एकीकृत समाजवादीका अध्यक्ष माधवकुमार नेपाल र जनता समाजवादीका अध्यक्ष उपेन्द्र यादव सहभागी भएका छन् ।

५ दलको गठबन्धनमा बसेको सरकारमा प्रधानमन्त्रीसहित ५ मन्त्री र एक राज्यमन्त्री रहेका छन् । सरकार बनेको दुई महिना पुग्नै लाग्दासमेत मन्त्री मण्डल विस्तार हुन नसक्दा केही दिनदेखि सत्ता गठबन्धन दलका नेताहरू बैठकमा जुटेका हुन् ।

आजको बैठकले सत्तारुढ दलभित्र मन्त्रालयको भागबण्डा टुंग्याउने गरी छलफल सुरु भएको जनाइएको छ ।