काठमाडौँ । सभामुख अग्निप्रसाद सापकोटाविरुद्ध सर्वोच्च अदालतमा परेको मुद्दामा संवैधानिक इजलासबाट सुनुवाई हुने भएको छ । सशस्त्र द्वन्द्वमा काभ्रेका अर्जुन लामाको हत्यामा संलग्न भएको आरोप सापकोटामाथि लागेको छ ।

विं.सं. २०६२ वैशाख १६ गते श्री कृष्ण मावि, दाप्चामा अभिभावक भेला स्थलबाटै लामा अपहरणमा परेका थिए । साउन तेस्रो साता खाल्डो खन्न लगाएर लामालाई जिउँदै पुरेको भन्दै उनकी पत्नी पूर्णिमायाले २०६४ सालमा सापकोटाविरुद्ध जाहेरी दिएकी थिइन् ।

प्रहरीले पूर्णिमायाले दिएकी जाहेरी दर्ता नगरेपछि सर्वोच्चमा उजुरी गरेकी थिइन् । २२ फागुन २०६४ मा सर्वोच्चको आदेशसँगै जाहेरी दर्ता भयो । तर, तत्कालीन बाबुराम भट्टराई नेतृत्वको सरकारले सापकोटाविरुद्ध मुद्दा तामेलीमा राख्ने निर्णय गरेको थियो ।

यसअघि ३० फागुन २०७६ मा यो मुद्दा पेशीमा चढाइए पनि हेर्न नभ्याएपछि सुनुवाई सरेको थियो ।

प्रधानन्यायाधीश चोलेन्द्र शमशेर नेतृत्वको संवैधानिक इजलासमा दीपककुमार कार्की, मीरा खड्का, हरिकृष्ण कार्की र ईश्वरप्रसाद खतिवडा न्यायाधीश छन् । उनीहरूको संवैधानिक इजलासले उक्त मुद्दा हेर्ने भएको हो ।