काठमाडौँ । गृह मन्त्रालयको कार्यसम्पादन मूल्यांकनमा तीन जिल्ला अति उत्कृष्टसहित प्रथम बनेका छन् । मन्त्रालयको नीति, योजना, अनुगमन तथा मूल्यांकन महाशाखाले गरेको मूल्यांकन अनुसार झापा, अर्घाखाँची र रुकुम(पूर्व) अति उत्कृष्टसहित प्रथम बनेका हुन् ।

यस्तै ललितपुर र रुकुम पश्चिम उत्कृष्ट कार्यसम्पादनसहित दोस्रो र गुल्मी तेस्रो स्थानमा परेका छन् । मन्त्रालयले सूचना जारी गर्दै कार्यसम्पादनमा अब्बल देखिएका जिल्लालाई प्रदेशस्तरीय सुरक्षा गोष्ठीका अवसरमा सम्मान गरिने जनाएको छ । उत्कृष्ट कार्यसम्पादन स्तर भएका ११ जिल्ला छन् भने उत्तम, मध्यम र न्यून कार्यसम्पादन स्तर भएका जिल्ला क्रमशः १८, २१ र २१ वटा रहेको मन्त्रालयले जनाएको छ ।

शान्ति सुरक्षा र अपराध नियन्त्रण, सुशासन र सेवा प्रवाह, लागु औषध नियन्त्रण, विपद् जोखिम न्यूनीकरण तथा व्यवस्थापन, विकास निर्माण अनुगमन र समन्वयर सदाचार र आर्थिक अनुशासनसँग सम्बन्धित कार्यसम्पादनको समग्र मापनका आधारमा मूल्याङ्कन गरिएको महाशाखा प्रमुख कमल ढकालले जानकारी गराए ।

गृह प्रशासन सुधार कार्य योजना, २०७४ अनुसार कार्यक्षेत्र तथा कानुनी प्रावधान भित्र रही मन्त्रालयका सचिव र प्रमुख जिल्ला अधिकारीबीच कार्यसम्पादन सम्झौता गर्ने गरिएको छ ।