काठमाडौं । प्रमुख प्रतिपक्षी दल नेकपा एमालेको विधान महाधिवेशन आगामी असोज १५ गतेदेखि काठमाडौंमा हुने भएको छ।

शनिबार बसेको स्थायी कमिटी बैठकले यसअघि तय भएको मिति परिवर्तन गर्दै असोज १५ गतेका लागि सारेको हो । काठमाडौंमा हुने विधान अधिवेशन तीन दिनसम्म चल्ने एमाले सचिब योगेश भट्टराइले जानकारी दिए ।

स्थायी कमिटी बैठकले विधान महाधिवेशनमा सहभागी हुने प्रतिनिधि संख्या टुंगो लगाएको छ ।

एमालेको विधानमा महाधिवेशनमा विधान परिषद्का सदस्यले भाग लिने व्यवस्था गरिएको भए पनि हाल सो परिषद् नभएकाले बाधाअड्काउ फुकुवामार्फत प्रतिनिधिबारे निर्णय गरिएको भट्टराईले बताए ।

विधान महाधिवेशनमा केन्द्रीय कमिटीका सबै पदाधिकारी र सदस्य, केन्द्रीय आयोगहरुका सबै पदाधिकारी र सदस्य, विभागबाट १५ जना, सबै जनवर्गीय संगठनबाट १०–१० जना राष्ट्रिय सभा, प्रतिनिधिसभा र प्रदेशका सांसदहरु, प्रदेश कमिटीका पदाधिकारी र सदस्यहरु, जिल्ला कमिटीका पदाधिकारी र सदस्यहरु, प्रत्येक निर्वाचन क्षेत्रबाट एक महिला, एक पुरुष र एक दलित, स्थानीय तहका प्रमुख र उपप्रमुख तथा जिल्ला समन्वय समितिका प्रमुख र उपप्रमुख सहभागी हुनेछन् ।

दश प्रतिशत प्रतिनिधिहरु केन्द्रीय कमिटीले मनोनित गर्नेसमेत वैठकले निर्णय गरेको छ । सबै गरी करिब ३ हजार प्रतिनिधिले महाधिवेशनमा भाग लिने सचिब भट्टराईले जानकारी दिएका छन् ।

विधान महाधिवेशन तयारीका विषयमा असोज ३ र ४ गते स्थायी कमिटी तथा ८ र ९ गते केन्द्रीय कमिटी बैठक बस्ने छ ।