काठमाडौं । नेपालमा ब्रोडब्याण्ड इन्टरनेट सेवा जनसंख्याभन्दा बढीको पहुँचमा पुगेको छ । नेपाल दूरसंचार प्राधिकरणले जारी गरेको (व्यवस्थित सूचना प्रणाली) एमआईएस प्रतिवेदन अनुसार नेपालभरका ३ करोड ९ लाख ५४ हजार जनासम्म यो सेवा पुगेको छ ।

प्राधिकरणले सन् २०११ देखि २०३१ सम्मको जनसंख्या वृद्धिलाई अनुमान र केन्द्रीय तथ्याङ्क विभागको तथ्याङ्क अनुसार हाल ३ करोड भन्दा बढी जनसख्या भएको अनुमानसहित उक्त तथ्याङ्क सार्वजनिक गरेको हो ।

दुरसञ्चारले इन्टरनेट प्रयोगकर्ताको संख्या भने एउटा सब्सक्राइबर बराबर ४ जना अर्थात एक घरमा कम्तिमा ४ जनाको आधारमा गणना गर्ने गरेको जनाएको छ ।

गत जेठदेखि असार महिनासम्म मात्रै ब्रोडब्याण्ड इन्टरनेट चलाउने प्रयोगकर्ता करिव ३२ प्रतिशतले बढेका छन् । जेठ महिनासम्म २ करोड ७७ लाख ६ हजार ७ सय ११ जना रहेका ब्रोडब्याण्ड प्रयोगकर्ता असारमा बढेर ३ करोड ९ लाख पुगेको प्राधिकरणले जारी गरेको प्रतिवेदनले जनाएको छ ।

यस अवधिमा नेपाल टेलिकमले मात्रै आफ्नो इन्टरनेट सेवा प्रयोगकर्ता २८ लाख ६० हजार जनाले बढाएको छ । गत जेठमा नेपाल टेलिकमको मोबाइल, फिक्स्ड (वायर र वायरलेस) सेवाबाटा ब्रोडब्याण्ड इन्टरनेट चलाउनेको संख्या १ करोड ३८ लाख ६८ हजार थियो । असारमा भने उक्त प्रयोगकर्ता बढ्दै १ करोड ६७ लाख २९ हजार पुगेका हुन् ।

यस अवधिमा टेलिकमले आफ्ना फोरजी ग्राहक २० लाखले बढाएको छ ।

यस्तै एनसेलले २ लाख ३८ हजारले बढाउँदा इन्टरनेट सेवाप्रदायक (आइएसपी)हरुले भने १ लाख ३३ हजारले बढाएको प्रतिवेदनमा उल्लेख छ ।

हाल एनसेलले उपलब्ध गराउने इन्टरनेट प्रयोग गर्नेको संख्या ७५ लाख ५ हजार पुग्दा आइएसपीको सेवा प्रयोग गर्ने ६५ लाख ५२ हजार जना पुगेका छन् ।

जसका कारण सर्वसाधारणले इन्टरनेटको प्रयोग सबै जनसंख्याले प्रयोग गरेको सामाजिक सञ्जालमा भाव प्रकट समेत गरेका छन् ।