काठमाडौँ । नेकपा एकीकृत समाजवादी (एस) प्रदेश १ संसदीय दलको नेतामा राजेन्द्र राई चयन भएका छन् । आज बिहान बसेको संसदीय दलको बैठकले उनलाई दलको नेता चयन गरेको हो ।

नेकपा एमाले विभाजित भएसँगै निर्वाचन आयोगले नेकपा एस रोजेका १० प्रदेशसभा सदस्यलाई मान्यता दिएको थियो । सोहीअनुसार दलको नेतामा राईलाई चयन गरेको हो ।

नेकपा एसको पक्षमा सनाखत गरेको प्रदेशसभा सदस्यलाई शुक्रबार निर्वाचन आयोगले सदर गरेको थियो ।

प्रदेश १ मा दलको नेता राईसहिहत राजन राई, उपेन्द्र घिमिरे, सावित्रा रेग्मी, खिनु लङ्वा लिम्बू, गणेश काङ्माङ, कृष्णकुमारी राई, पदमकुमारी गुरुङ, सुनिता चौधरी र सरिता थापाले सनाखत गरेका थिए ।

यससँगै बहुमत प्राप्त मुख्यमन्त्री भीम आचार्य अल्पमतमा परेका छन् । यससँगै आगामी असोज ९ गतेभित्र उनले विश्वासको मत लिइसक्नु पर्ने छ ।