काठमाडौँ । नेपाली कांग्रेसका वरिष्ठ नेता रामचन्द्र पौडेल पक्षीय नेताले निर्वाचन समितिका पदाधिकारीलाई भेटेर महाधिवेशन निष्पक्ष ढंगले सम्पन्न गर्न ध्यानाकर्षण गराउने भएका छन् ।

बिहीबार दिउँसो २ बजेतिर समितिको ध्यानाकर्षण गराउन उनीहरू पार्टी केन्द्रीय कार्यालय सानेपा जाँदै एक नेताले मेरोन्युसँग बताए । ति नेताका अनुसार निर्वाचन समितिको कार्यालय सानेपामा महामन्त्री डा. शशांक कोइराला, पूर्वमहामन्त्री प्रकाशमान सिंह, कोषाध्यक्ष सीतादेवी यादव, नेताहरू अर्जुननरसिंह केसी, शेखर कोइराला, डा. मीनेन्द्र रिजाललगायत जाने छन् ।

केही दिनअघि पौडेल पक्षले सभापति शेरबहादुर देउवाको गृह जिल्ला डडेलधुरामा प्रहरी प्रसासन लगाएर वडा अधिवेशन गरेको भन्दै त्यो अधिवेशन आफुहरुलाई मान्य नहुने पुनः अधिवेशन गराउनुपर्ने माग गरेको छ । त्यो विषयमा पनि छलफल हुने र बाँकी रहेका २१ जिल्लामा पनि संस्थापन पक्षको भयमा नपरी निष्पक्ष ढंगले अधिवेशन गराउन सुझाव दिने पौडेल पक्षको तयारी छ ।