काठमाडौं । पहिले माओवादी केन्द्रमा रहेका तर पछि पार्टी विभाजनपछि अन्यत्रै पार्टीमा पुगेका पूर्व सांसद प्रल्लाद लामिछाने लगायत नेता कार्यकर्ता माओवादी केन्द्रमै फर्किएका छन् ।

मकवानपुर जिल्ला बाट निर्वाचित पूर्व सांसद प्रल्लाद लामिछाने लगायत नेता कार्यकर्ताहरुलाई माओवादी केन्द्रका अध्यक्ष पुष्पकमल दाहाल प्रचण्डले पार्टीमा फेरि स्वागत गरेका हुन।

त्यस्तै चितवन जिल्ला बाट रमेश रेग्मी (अमर) तथा बाबुराम पोख्रेल लगायत नेता कार्यकर्ता पनि माओवादी केन्द्रमै फर्किएका छन् ।

लामिछाने लगायत यो टोली डा. वावुराम भट्टराईको नयाँ शक्तितिर लागेका थिए । तर लामिछाने नयाँ शक्तिमा अडिएनन । त्यसपछि उनी एमाले प्रवेश गरेका थिए । तर एमाले अध्यक्ष ओलीले लिएको बाटो निरंकुशताको बाटो भएको र प्राप्त उपलब्धीलाई निस्तेज पार्ने अभियानमा लागेको भन्दै उनी पूनः माओवादी केन्द्रमै फर्किएका हुन् ।

उनीहरुलाई प्रचण्डले आफ्नै निवास खुमलटारमा आज एक कार्यक्रमका वीच पार्टीमा स्वागत गरेका हुन् ।