काठमाडौं । जातीय छुवाछुत तथा विभेद गरेको आरोप लागेकी सरस्वती प्रधानलाई १ लाख १५ हजार रुपैयाँ धरौटी बुझाउन अदालतले आदेश दिएको छ ।

जातीय विभेद तथा छुवाछुतजन्य कसूर गरेको भन्दै दायर भएको मुद्दामा सुनुवाइ गर्दै काठमाडौं जिल्ला अदालतका न्यायाधीश नारायणप्रसाद सुवेदीको इजलासले १ लाख १५ हजार रुपैयाँ धरौटी बुझाउन आदेश दिएको हो ।

सञ्चारकर्मी रुपा सुनारले प्रहरीमा दिएको जाहेरीअनुसार भएको अनुसन्धानको प्रतिवेदनका आधारमा जिल्ला सरकारी वकिलको कार्यालयले केही दिनअघि काठमाडौं जिल्ला अदालतमा प्रधानविरुद्ध मुद्दा दायर गरेको थियो ।

बुधबार प्रधान अदालतमा उपस्थित भएपछि उनको बयान लिइ थुनछेक बहस भएको थियो ।

गत असार १ गते कोठा हेर्न गएकी सुनारले आफू दलितकी छोरी भएको घरेबेटी प्रधानलाई जानकारी गराएपछि प्रधानले कोठा भाडामा दिन अस्वीकार गरेकी थिइन ।

घरबेटी प्रधानबाट आफूमाथि जातीय विभेद भएको भन्दै सुनारले प्रधानविरुद्ध महानगरीय प्रहरी वृत्त सिंहदरबारमा जाहेरी दिएपछि प्रहरीले घरबेटी प्रधानलाई पक्राउ गरी अनुसन्धान थालेको थियो ।