काठमाडौं । गैरआवासीय नेपाली संघ (एनआरएनए) का पूर्वउपाध्यक्ष कुल आचार्यले एनआरएनएको अध्यक्षमा उम्मेदवारी दिने भएका छन् ।

काठमाडौंमा आइतबार पत्रकार सम्मेलन गरी आचार्यले सन् २०२१–२०२३ को कार्यकालका लागि संघको अध्यक्षमा उम्मेदवारी दिने घोषणा गरेका हुन् । संघको दशौं विश्व सम्मेलन आगामी अक्टोबरको २३–२५ सम्म काठमाडौंमा हुँदैछ ।

उनले पत्रकारसँगको कुराकानीमा ‘एनआरएनएलाई सही अर्थमा आम प्रवासी नेपालीको साझा संस्था बनाउने मेरो अभियान हो । संस्थामा सबैको सहभागिता र अपनत्व सिर्जना गरेर यो अभियानलाई पूर्णता दिनेछु, ।’

उनले सम्पत्तिको अधिकार, राहदानीसहित तेस्रो पुस्ता पछि पनि कायम रहने गरी गैरआवासीय नेपाली नागरिकतालाई कार्यान्वयन गर्न प्राथमिकता दिने दाबी गरे ।

अध्यक्षको उम्मेदारी दिने घोषणा गरेका आचार्यले आफ्नो दुई वर्षे कार्यकालमा संसारभर एनआरएनएको पन्जीकृत सदस्य संख्या पाँच लाख पु¥याउने र राष्ट्रिय समन्वय परिषद्को संख्या कम्तीमा एक सय पु¥याउने बताएका छन् । गैरआवासीय नेपालीलाई मात्रै नभई संसारका विभिन्न देशमा रहेका नेपालीलाई पनि जोड्ने उनको योजना छ ।

थाइल्याण्ड, म्यानमारलगायतका मुलुकमा बसोबास गर्ने नेपालीलाई पिपुल अफ नेपाली ओरिजिन (पीएनओ) को मान्यता दिलाउन पहल गर्ने आचार्यले बताए । पर्वतको धाइरिङमा जन्मेका आचार्य हाल बेलायतमा बसोबास गर्दै आइरहेका छन् । उनी लण्डनका स्थापित व्यवसायी हुन् ।

दुई दशकदेखि एनआरएन अभियानमा सक्रिय आचार्यले आफ्ना कार्ययोजना सार्वजनिक गर्दै संगठनको सुदृढीकरण र संस्थागत पारदर्शिताको मुद्दालाई प्राथमिकतामा राखेको बताए ।

यसअघि उपाध्यक्ष रविना थापा र डा. बद्री केसीले अध्यक्षमा उम्मेदवारी घोषणा गरिसकेका छन् । थापा अमेरिकामा बस्दै आएकी छिन् भने केसी रसियामा बसोबास गर्छन् ।