काठमाडौं । चौंथो संस्करणको एभरेष्ट प्रिमियर लिग ईपीएल टी ट्वान्टी क्रिकेटमा भैरहवा ग्लाडीयटर्सले पहिलो जीत हात पारेको छ । काठमाडौंका त्रिवि क्रिकेट मैदानमा बुधबार विराटनगर वारियर्सलाई ६ विकेटले पराजित गर्दै भैरहवाले जीत हात पारेको हो ।

विराटनगरले दिएको ९० रनको लक्ष्य भैरहवाले १५ ओभर ३ बलमा ४ विकेट गुमाएर पूरा गर्यो । भैरहवाको जीतमा उपुल थरंगाले अविजित रहदै सर्वाधिक ३४ रन जोडे । कप्तान शरद भेषवाकर ६ रनमा अविजित रहे ।

प्रदिप ऐरीले २२ रन जोड्दा तमिम इकबाल र रोहित पौडेलले समान १२–१२ रन जोडे भने आरिफ शेख सून्य रनमा आउट भए । विराटनगरका रामनरेश गिरिले २ विकेट लिएका थिए भने करण केसी र बसन्त रेग्मीले समान एक एक विकेट लिए ।

यसअघि टस हारेर पहिले ब्याटिङको निम्तो पाएको विराटनगर १७ ओभर ४ बलमा अलआउट हुँदै ८९ रन बनाएको थियो ।

वर्षाका कारण भैरहवाले यसअघिको खेलमा अंक बाँडेको थियो । जीतसँगै भैरहवाले ३ अंक जोडेको छ ।

बुधबार नै भएको अर्को खेलमा पोखराले ललितपुरलाई ९ विकेटले पराजित गरेको थियो ।