काठमाडौँ । गृह मन्त्रालयले जिल्ला प्रशासन कार्यालय काठमाडौँ र भक्तपुरले जारी गरेको आदेशप्रति आपत्ति जनाएको छ । उपत्यकाको दुई जिल्लाले कोभिड १९ महामारी रोकथाम तथा नियन्त्रण गर्ने भन्दै विभिन्न आदेश जारी गरेको थियो ।

‘नेपालको संविधान, प्रचलित कानून र कोभिड १९ को नियन्त्रणका लागि जारी गरिएको स्वास्थ्य प्रोटोकलभित्र रही गरिने कुने पनि क्रियाकलापमा बन्देज लगाउने नेपाल सरकारको कुनै आदेश र उद्देश्य नभएको व्यहोरा सबैको जानकारीको लागि अनुरोध छ,’ विज्ञप्तिमा भनिएको छ ।

जिल्ला प्रशासनले घर बाहिर निस्कने, जम्मा हुने, सभा जुलुस गर्ने, भोज भतेरलगायत नगर्ने नगराउने, घरभित्रै बसेर चाड पर्व मनाउनेजस्ता आदेश जारी गरेको थियो । यस्तै, कूल सिट क्षमताभन्दा बढी यात्रु नराख्ने, अनिवार्य रुपमा मास्क लगाउने, अनिवार्य रुपमा स्यानिटाइर प्रयोग गर्न आग्रह गरेको छ ।

गत वैशाख १६ गतेदेखि लागु भएको निषेधाज्ञा खुकुलो हुँर्दै गर्दा जिल्ला प्रशासनले केही कडाई गर्ने निर्णय गरेको हो ।