काठमाडौँ । १४ वर्षीय बालिकालाई भारतमा बेच्ने तयारी गरेका युवा बिहीबार पक्राउ परेका छन् । पर्वत जिल्लाको मोदी गाउँपालिका ५ बस्ने २४ वर्षीय सूर्यबहादुर भण्डारीले बालिकासँग प्रेमको नाटक गरी भारतमा बेच्ने तयारी गरेका थिए ।

बालिकालाई गत असोज ६ गते भण्डारीले प्रेमको नाटक गरी नेपाल भारत सीमा जोगबनी पुर्‍याएका थिए । जिल्ला प्रहरी कार्यालय पर्वतबाट खटिएको प्रहरी टोलीले उनलाई कुश्मा नगरपालिका ६ शिवालयबाट पक्राउ गर्न सफल भएको हो ।

उनीमाथि मानव बेचबिखन तथा ओसारपोसार मुद्दामा जिल्ला अदालत पर्वतबाट म्याद थप गराई आवश्यक अनुसन्धान सुरु गरेको जिल्ला प्रहरी कार्यालय पर्वतले जनाएको छ ।