काठमाडौँ । नेपाली कांग्रेस काठमाडौँको पालिका स्तरीय अधिवेशन आज हुने भएको छ । पार्टीको केन्द्रीय निर्वाचन समितिले क्रियाशील सदस्यता टुंगिएका जिल्लामा वडा र पालिका अधिवेशन गर्न निर्देशन दिएसँगै आज काठमाडौँमा पालिका स्तरीय अधिवेशन हुने भएको हो ।

काठमाडौँका निर्वाचन अधिकृत एवं वरिष्ठ अधिवक्ता नरहरि आचार्यले काठमाडौँ महानगरपालिकासहित १० नगरपालिकामा निर्वाचन हुन लागेको जानकारी दिए । काठमाडौँको दक्षिणकाली नगरपालिकामा भने आज अधिवेशन नहुने भएको छ ।

दक्षिणकाली–२ को क्रियाशील सदस्यता विवाद कायमै रहेकाले उक्त पालिकामा निर्वाचन सम्पन्न गर्न नसकिएको आचार्यले जानकारी दिए ।

प्रजातान्त्रिक पार्टी कांग्रेसको राजधानीमा हुने पालिका अधिवेशनलाई विशेष चासोका साथ हेरिएको छ । केन्द्रीय निर्वाचन समितिले हाल देशभरका ७० भन्दा बढी जिल्लाको क्रियाशील सदस्यता टुंगाएर अधिवेशनका लागि मार्गप्रशस्त गरिसकेको छ ।

यस्तै, केही जिल्लाको क्रियाशील सदस्यता विवादलाई भने टुंगाउन सकेको छैन । कांग्रेसले आगामी मंसिर ९ देखि १२ गतेसम्मका लागि केन्द्रीय महाधिवेशनको कार्यतालिका यसअघि नै तोकिसकेको छ ।