काठमाडौँ । नक्कली नोट कारोबारको आरोपमा प्रहरीले धनकुटाबाट ६ जनालाई पक्राउ गरेको छ । उनीहरूलाई प्रहरीले पक्राउ गरी आज सार्वजनिक गरेको हो ।

पक्राउ पर्नेमा धनकुटा नगरपालिका १ हिलेका वर्ष २६ का विशाल तामाङ, सोही स्थानका वर्ष २४ का सोनम तामाङ, महालक्ष्मी नगरपालिका ८ का वर्ष २६ का सुमन खड्का, वडा नं। ९ का वर्ष २४ का तुलसी तामाङ र वर्ष २१ विकाश तामाङ तथा ताप्लेजुङको याङबरक गाउँपालिका ४ का वर्ष २६ का छितेन तामाङ रहेका छन् ।

असोज ११ गते धनकुटाको मुलघाटबाट २८ हजार नक्कली नोटसहित प्रहरीले विशाल र छितेनलाई पक्राउ गरेको थियो । अनुसन्धानको क्रममा प्रहरीले थप अरूलाईसमेत पक्राउ गरेको हो ।

पक्राउ परेकाहरूलाई नक्कली नोटको प्रयोग गराउन लगाउने अर्का एक युवालाई पनि प्रहरीले काठमाडौंबाट पक्राउ गरेको छ । पक्राउ परेकालाई जिल्ला अदालत धनकुटामा खोटा मुद्राअन्तर्गतको मुद्दा दायर गरी अदालतबाट म्याद थप गरी थुनामा राखिएको प्रहरीले जनाएको छ । अनुसन्धान भइरहेको प्रहरीले जनाएको छ ।