काठमाडौँ । प्रधानमन्त्री शेरबहादुर देउवाले बाढी, पहिरो तथा डुबानमा परेकाहरूलाई राहत दिने घोषणा गरेका छन् ।

बुधबार दिउँसो प्रधानमन्त्री देउवाको अध्यक्षतामा बसेको विपद् जोखिम न्यूनीकरण तथा व्यवस्थापन राष्ट्रिय परिषदको बैठकमा बोल्दै उनले विपदमा परेकाहरूलाई राहत दिने घोषणा गरेको हुन् ।

गत आइतबारदेखि देशभर परेको अविरल वर्षाका कारण ठूलो जनधनको क्षति भएको भन्दै प्रधानमन्त्री देउवाले क्षतिपूर्ति दिने निर्णय गरेका हुन् । यस्तै, उनले पीडितहरूलाई उद्धार तथा राहत दिनसमेत सम्बन्धित निकायलाई निर्देशन दिएका छन् ।

वर्षाका कारण सुदूरपश्चिम प्रदेश बढी मात्रामा प्रभावित भएको छ । बाढी पहिरोमा परी अहिलेसम्म देशभर ४८ जनाको मृत्यु भइसकेको छ भने ३१ जना बेपत्ता भएका छन् । यस्तै, २३ जना घाइते भएका छन् ।

वर्षासँगै आएको बाढी पहिरोका कारण सुदूरपश्चिमका ६ जिल्लासहित केही जिल्ला सम्पर्कविहीन हुँदा थप विवरण आउन बाँकी रहेको छ ।