काठमाडौं । इजलास बहिस्कार गरिरहेका सर्वोच्च अदालतका न्यायाधीशहरुविरुद्ध सर्वोच्च अदालतमा रिट पेश भएको छ । तीन अधिवक्तासहित सात जनाले शुक्रबार परमादेश जारी गर्न माग गरेका हुन् ।

न्यायाधीशहरूले इजलास बहिष्कार गर्दा संविधानप्रदत्त मौलिक हक हनन् भएको, बन्दी तथा थुनुवाहरूको हकमा बन्दी प्रत्यक्षीकरणको मुद्दासमेत प्रभावित भएका जस्ता विषय उठाउँदै परमादेश जारी गर्न माग गरिएको छ ।

अधिवक्ता कीर्तिनाथ शर्मासहित कृष्ण प्रसाई, तोयानाथ ढुंगाना, सभ्यता नेपाल, नकुल तिमल्सिना, शिवराम थापा र नेत्रप्रसाद मैनालीले शुक्रवार रिट पेश गरेका हुन् । रिटमा प्रधानन्यायाधीशबाहेक सबै न्यायाधीशलाई विपक्षी बनाइएको छ ।

रिटमा पेसी सूचीका कुनै पनि मुद्दा नरोक्न र इजलासमा बसी स्वच्छ सुनुवाइ गर्नका लागि विपक्षी न्यायाधीशहरूका नाममा परमादेश माग गरिएको छ ।

वरिष्ठतम न्यायाधीश दीपककुमार कार्कीको नेतृत्वमा न्यायाधीशहरूले प्रधानन्यायाधीश चोलेन्द्र शम्शेर जबराले निकास दिनपर्ने भन्दै गत सोमबारदेखि इजलास बहिष्कार गरेका छन् ।