काठमाडौं । कानून ब्यवसायीहरुको छाता संगठन नेपाल बार एशोसियसनले चरणबद्ध आन्दोलन गर्ने निर्णय गरेको छ । शुक्रबार बसेको बारको बैठकले चरणबद्ध आन्दोलन गर्ने निर्णय गरेको हो ।

आन्दोलनको कार्यक्रम अन्तर्गत आइतबारदेखि बुधबारसम्म दैनिक एक घण्टा कालो पट्टी बाधेर विरोध जनाउने भएका छन् । पाँच दिनसम्मको आन्दोलनबाट पनि निकास ननिस्किएमा थप आन्दोलन गर्ने बारले निर्णय गरेको छ ।

यस्तै, बारले प्रधान्यायाधीश चोलेन्द्र शमशेर राणालाई इजलासमा प्रवेश नगर्न माग गरेको छ । बार बैठकले प्रधानन्यायाधीश जबरालाई कुनै पनि इजलासमा नबस्न र अदालतको सन्दर्भमा कुनै पनि निर्णय नगर्न माग गर्ने निर्णय गरेको छ ।

बार एशोशिएशनका साथै सर्वोच्चका न्यायाधीशहरु, चार पूर्व प्रधानन्यायाधीशका साथै अधिकांश कानून ब्यवसायीहरुले अदालतको ब्यथिति बढेको भन्दै न्यायालयको शुद्धिकरणका लागि प्रधानन्यायाधीश जबराले मार्गप्रशस्त गर्नुपर्ने माग गर्दै आएका छन् ।

त्यसैगरी न्यायपालिकाको वर्तमान अवस्था र नेपाल बार एसोसिएसनको निर्णयको बारेमा ९० वटै बार इकाइहरुमा परिपत्र गर्ने र बारको निर्णय कार्यान्वयन गर्न अनुरोध गर्ने, ९० वटै बार इकाइका अध्यक्ष र सचिवसँग भर्चुअल माध्यमबाट छलफल, अन्तरक्रिया र सुझाव संकलन गर्ने निर्णय गरिएको पनि महासचिव लिलामणि पौडेलले बताए ।

उनले यति विरोधका कार्यक्रम गर्दापनि प्रधानन्यायाधीश जबराको राजिनामा नआएमा विरोधका थप कार्यक्रमहरु घोषणा गर्ने बताए ।

प्रधानन्यायाधीश जबराले न्यायाधीश हरिकृष्ण कार्कीले पेश गरेको प्रतिवेदन कार्यान्वयन गर्न नसकेको, मन्त्रिपरिषद्मा र संवैधानिक आयोगहरुमा भाग खोजेको र न्यायालयमा प्रत्यक्ष राजनीतिक हस्तक्षप भएका कारण नेपाल बार एसोसिएसन आन्दोलनमा उत्रिनुपरेको बारका महासचिव पौडेलले बताए ।