काठमाडौँ । भारतमा पछिल्लो एक दिनमा थप १२ हजारभन्दा बढी मानिस कोरोना भाइरसबाट संक्रमित भएका छन् । सरकारी अधिकारीले बिहीबार बिहान दिएको जानकारीअनुसार थप १२ हजार ८५५ जनामा संक्रमण पुष्टि भएको हो ।

सोही अवधिमा भारतमा कूल ४६१ जनाले कोरोनाबाट ज्यान गुमाएको केन्द्रीय स्वास्थ्य मन्त्रालयले जनाएको छ । भारतमा अहिले संक्रमित अवस्थामै रहेकाको कुल संख्या एक लाख ४८ हजार ५७९ रहेको छ । तीमध्ये १५ हजार ५४ जना पछिल्लो एक दिनमा संक्रमणमुक्त भएका हुन् ।

दैनिक नयाँ संक्रमितको संख्याभन्दा संक्रमणमुक्त हुने धेरै भएकाले संक्रमित अवस्थामै रहेकाको संख्या दिनप्रति दिन घट्दै गइरहेको छ । भारतमा अहिलेसम्म संक्रमणमुक्त भइसकेकाको कुल संख्या तीन करोड ३७ लाख १२ हजार ७९४ पुगेको मन्त्रालयले जनाएको छ ।

त्यसैगरी भारतमा कोरोनाबाट अहिलेसम्म चार लाख ५९ हजार ६५२ मृत्यु भएको छ ।