काठमाडौँ । गुगलले प्रयोगकर्ताको खातालाई थप सुरक्षित र भरपर्दो राख्न गुगल खातामा ठूलो परिवर्तन गर्ने निर्णय गरेको छ । यहि नोभेम्बर ९ तारिख अर्थात् मंगलबारदेखि गुगलका सबै उत्पादन तथा सेवाहरुमा नयाँ सुरक्षा अपडेट जारी गरिने कम्पनीले जनाएको दी इकोनोमिक टाइम्सले उल्लेख गरेको छ ।

गुगल खाताको नयाँ नियममानुसार लगइन गर्न दुई चरणको प्रमाणीकरण अर्थात् दुई–स्टेप अथेन्टिकेसन प्रयोग गर्नुपर्नेछ । सो नियमलाई पालना नगरे आफ्नो एकाउन्टमा पहुँच गर्न सक्षम नहुने कम्पनीले जनाएको छ ।

यो नयाँ नियम गुगलमा एकाउन्ट खोलेका सबै प्रयोगकर्ताहरुका लागि अनिवार्य लागू हुनेछ । कम्पनीले सुरक्षालाई ध्यानमा राखी दुई चरणको प्रमाणिकरण कार्यान्वयन गर्न निकै जरुरी रहेको सूचना दिएको छ ।

गीज्मोचाइनाको रिपोर्टअनुसार गुगलले नोभेम्बर ९ बाट यो नयाँ सुरक्षा प्रणाली लागू गर्नेछ । यसबाट, सबै गुगल खाताले अतिरिक्त तह सुरक्षा पाउनेछन् र यसले व्यक्तिगत डाटा धेरै सुरक्षित राख्नेछ कम्पनीको दाबी छ ।

अहिले पासवर्ड चोरीका घटनाहरु बाहिर आउने क्रम जारी छ । यस सम्बन्धमा गुगलमा अनगिन्ती गुनासो आइरहेका छन् । यसैलाई ध्यानमा राखेर यो कदम चालिएको कम्पनीले बताएको छ ।