उच्चस्तरीय राजनीतिक समितिको पहिलो बैठक शुरु

मेरोन्यूज २०७८ कार्तिक ३० गते १६:१०

काठमाडौँ । सत्तारुढ गठबन्धनको उच्चस्तरीय राजनीतिक समन्वय समितिको बैठक सिंहदरबारमा शुरु भएको छ ।

नेपाली कांग्रेसका बरिष्ठ नेता रामचन्द्र पौडेलको संयोजकत्वमा बनेको सत्ता गठबन्धनको उच्चस्तरीय समन्वय समितिको पहिलो बैठक बसेको हो । समितिको पहिलो बैठकमा प्रधानमन्त्री शेरबहादुर देउवाको पनि सहभागिता रहेको छ ।

बैठकमा समसामयिक राजनीति, आसन्न राष्ट्रियसभा निर्वाचन, समितिको कार्यविधि, समितिको सचिवालय बनाउने लगायतका विषयमा छलफल हुँदैछ ।

समिति गठन गरेकै दिन कात्तिक ३० गते पहिलो बैठक गर्ने दलहरुबीच सहमति भएको थियो ।

समन्वय समितिमा नेपाली कांग्रेसबाट पौडेल र पूर्वमहामन्त्री कृष्णप्रसाद सिटौला, नेकपा माओवादी केन्द्रबाट अध्यक्ष पुष्पकमल दाहाल र नेता नारायणकाजी श्रेष्ठ, नेकपा समाजवादीबाट अध्यक्ष माधवकुमार नेपाल, जसपाबाट उपेन्द्र यादव तथा राष्ट्रिय जनमोर्चाबाट चित्रबहादुर केसी र दुर्गा पौडेल छन् ।