काठमाडौँ । नेपाली कांग्रेसले शुक्रबारदेखि प्रदेशसभा क्षेत्रीय अधिवेशन गर्ने भएको छ । पार्टीको १४ औँ महाधिवेशनअन्तर्गत आज प्रदेशसभा क्षेत्रीय अधिवेशन हुने भएको हो ।

वडा र पालिका तहको अधिवेशन भइसकेका जिल्लामा हुने अधिवेशनले कार्यसमिति र प्रदेश अधिवेशनका लागि प्रतिनिधि चयन गर्ने भएको छ । कांग्रेसको विधानमा देशभर तीन सय ३० वटै प्रदेशसभा निर्वाचन क्षेत्रमा प्रदेशसभा क्षेत्रीय कार्यसमिति रहने व्यवस्था रहेको छ ।

त्यस्तै, हरेक प्रदेशसभा क्षेत्रबाट एक जना सभापति र १५ जना प्रतिनिधि चयन हुने छन् । क्षेत्रीय अधिवेशन चयन हुने प्रतिनिधिहरूले सम्बन्धित प्रदेशको अधिवेशनमा मताधिकार पाउने छन् ।

कांग्रेस महाधिवेशन कार्य तालिकाअनुसार आजदेखि प्रदेशसभा क्षेत्रीय अधिवेशन, ६ गतेदेखि प्रतिनिधिसभा क्षेत्रीय अधिवेशन, १० गतेदेखि जिल्ला अधिवेशन तथा १६ र १७ गते प्रदेश अधिवेशन हुने भएको छ ।

पार्टीको महाधिवेशन आगामी मंसिर २४ देखि २६ गतेसम्म काठमाडौंमा हुँदै छ ।