काठमाडौं । पूर्व पञ्चहरुको पार्टी राष्ट्रिय प्रजातन्त्र पार्टी (राप्रपा)मा महाधिवेशनको सम्मुखमा नयाँ नयाँ धुव्रिकरण देखा पर्न थालेको छ । महाधिवेशन पछि नयाँ नेतृत्वका लागि राजेन्द्र लिङ्देनले मंसिर ९ गते उम्मेदवारी घोषणा गरेपछि सोमबार कमल थापाले पनि आफ्नो उम्मेदवारी घोषणा गरेका हुन् ।

दुई आकांक्षीको उम्मेदवारी घोषणा पछि राप्रपाका तीन जना अध्यक्षमै पनि धुव्रिकरण भएको छ । अध्यक्ष पशुपति शम्शेर जवराले अध्यक्षमा कमल थापालाई समर्थन जनाएका छन् । तर अर्का अध्यक्ष डा प्रकाशचन्दै लोहनीले भने राजेन्द्र लिङ्देनलाई समर्थन जनाएका छन् । यसले राप्रपाभित्रको महाधिवेशनमा थप धुव्रिकरण वढेको छ ।

राजेन्द्र लिङ्देनलाई नेपालगञ्ज उपमहनागर पालिकाका मेयर समेत रहेका धबलशम्शेर राणाको पनि साथ र समर्थन रहेको छ । उनी राजेन्द्र लिङ्देनको समुहबाटै महामन्त्रीका उम्मेदवार बनेका छन् । राजेन्द्र लिङ्देन अगाडी नसकेका भए धबलसम्शेर आफै चुनावी प्रतिस्पर्धामा अध्यक्षमा भिड्ने तयारीमा थिए । तर राजेन्द्र लिङ्देन र धबल सम्शेरका वीचमा समझदारी बनेर लिङ्देन अध्यक्ष र राणा महामन्त्रीका उम्मेदवार बनेका हुन् ।

यो समुहलाई कलाकार समेत रहेकी रेशा थापाको पनि समर्थन रहेको थियो ।

कमल थापाले पनि सोमबार अध्यक्षमा उम्मेदवारी घोषणा गदै टुडिखेलमा राजेन्द्र लिङ्देनलाई दौडमा भाग लिएर जसले जित्छ उसैलाई अध्यक्ष घोषणा गर्ने सम्मको चुनौति दिएपछि राप्रपाका नेताहरु धुव्रिकरण हुने क्रम वढेको छ ।

पार्टी एकीकरणपछि राप्रपाको पहिलो महाधिवेशन मंसिर १५ देखि १७ सम्म काठमाडौंमा हुँदैछ । दुई वर्षअघि राप्रपा र राप्रपा संयुक्त एकीकरण भएपछि कमल थापा, पशुपति शम्शेर जबरा र डा प्रकाशचन्द्र लोहनीले अध्यक्षको जिम्मेवारी निर्वाह गर्दै आएका थिए ।

राजेन्द्र लिङ्देन र कमल थापाले चुनावी प्रतिस्पर्धा गर्ने भएपछि राप्रपाको यसपटकको महाधिवेशन रोचक हुने देखिएको छ । प्रकाशचन्द्र लोहनीले आगामी महाधिवेशनमा राजेन्द्र लिङ्देनलाई सघाउने भएका छन् । नयाँ पुस्तालाई पार्टीको नेतृत्व हस्तान्तरण गर्नुपर्ने भन्दै उनले आउँदो महाधिवेशनमा अध्यक्षका उम्मेदवार लिङ्देनलाई आफ्नो समर्थन रहने बताएका छन् ।

‘पशुपतिजीले २० वर्ष र कमलजीले १५ वर्ष पार्टीको नेतृत्व सम्हाली सक्नु भएको छ । मैले एकवर्ष मात्रै नेतृत्व लिएँ । आगामी महाधिवेशनमा अध्यक्षमा मलाई समर्थन गर्नुस भनेको थिए । तर,उहाँहरु नै अघि सर्नु भएकाले मेरो साथ युवा साथीहरुलाई छ ।’ डा लोहनीले भने ।

तर अर्का अध्यक्ष पुशपति शम्शेर राणाले भने कमल थापालाई नै समर्थन रहने जनाएका छन् । कमल थापाको उम्मेदवारी घोषणामा राणा पक्षका नेता ध्रुवबहादुर प्रधान र रोशन कार्कीलगायतका नेताहरु सहभागी भएका थिए । यसले पनि जवराको साथ कमल थापाप्रति देखिएको राप्रपाभित्र चर्चा छ । जबरा समूहका नेता भुवन पाठक कमल थापाको समूहबाट महामन्त्रीको उम्मेदवारी दिने घोषणा गरिसकेका छन् ।