काठमाडौँ । नेकपा माओवादी केन्द्रले प्रदेश कमिटीमा पदाधिकारी र सदस्यको संख्या बढाएको छ । बिहीबार केन्द्रीय पार्टी कार्यालयमा बसेको माओवादी केन्द्रको स्थायी कमिटी बैठकले प्रदेश कमिटीमा पदाधिकारी र सदस्य संख्या बढाउने निर्णय गरेको हो ।

बैठकले पदाधिकारीको संख्या ७ बाट ९ र सदस्यको संख्या १ सय ७५ बाट निर्वाचन क्षेत्र र पालिकालाई आधार मानेर कमिटी बनाउने निर्णय गरेको पार्टी प्रवक्ता कृष्ण बहादुर महराले बताए । अब माओवादी केन्द्रको प्रदेश कमिटीको पदाधिकारीमा अध्यक्ष, तीन उपाध्यक्ष, सचिव, तीन सहसचिव र कोषाध्यक्ष रहने छन् ।

यस्तै प्रदेश कमिटीमा प्रदेश १ मा २५९, प्रदेश २ मा २७१, वागमीतमा २७५, गण्डकीमा २२९, लुम्बिनीमा २५३, कर्णालीमा २११ र सुदूरपश्चिममा २२३ सदस्यीय प्रदेश समिति बन्ने छन् ।

यस्तै बैठकले पम्फा भुसालको नेतृत्वमा महिला विभाग बनाएको छ । पार्टी प्रवेश गर्न चाहनेहरुसँग वार्ता गर्न देव गुरुङ, गिरिराजमणि पोखरेल र श्रीराम ढकाल रहेको समिति बनाएको प्रवक्ता महराले बताए ।