काठमाडौं । नेपाली कांग्रेसको नयाँ नेतृत्व चयनका लागि भएको निर्वाचनअन्तर्गत सहमहामन्त्री पदको मतगणना जारी छ । आज बिहान करिब ११ बजेदेखि कांग्रेस केन्द्रीय कार्यालय सानेपामा मतगणना भइरहेको छ ।

केन्द्रीय निर्वाचन समितिका अनुसार अहिले तीनवटा क्लष्टरको सहामहामन्त्रीको मुस्लिम, मधेसी र खसआर्यतर्फको मतगणना भइरहेको हो । नौ ठाउँमा मतगणना भइरहेको छ ।

खसआर्यतर्फ किशोरसिंह राठौर र देवराज चालिसे, मधेसीतर्फ महेन्द्र यादव, रञ्जीत कर्ण र रामकृष्ण यादव तथा मुस्लिमतर्फ फरमुल्लाह मन्सुर र शेख वकिल प्रतिष्पर्धामा छन् ।

बिहीबार महिला दलित/आदिवासी जनजाति तर्फको सहमहामन्त्रीको मतगणनापश्चात् नतिजा सार्वजनिक भइसकेको छ ।

महिला सहमहामन्त्रीमा महालक्ष्मी उपाध्याय ‘डिना’, आदिवासी जनजातितर्फ भीष्मराज आङदेम्बे र दलित सहमहामन्त्रीमा जीवन परियार विजयी भइसकेका छन् ।