काठमाडौं । सरकारले एक डोज मात्रै लगाए हुने कोभिडविरुद्धको खोप जोन्सन एण्ड जोन्सनको ‘जानसन’ विदेश जाने व्यक्तिले लगाउन पाउने भएका छन् ।

स्वास्थ्य कार्यालय काठमाडौँका प्रमुख शम्भु काफ्लेले विदेश जानेहरुका लागि जिल्लाका चारवटा सरकारी अस्पतालबाट ‘जोनसन’ खोप दिइरहेको जानकारी दिए ।
काफ्लेका अनुसार छाउनीस्थित वीरेन्द्र सैनिक प्रहरी अस्पताल, महाराजगञ्जस्थित नेपाल प्रहरी अस्पताल, बलम्बुस्थित सशस्त्र प्रहरी अस्पताल र टेकुस्थित शहीद शुक्रराज ट्रपिकल तथा सरुवा रोगबाट जोन्सन एण्ड जोन्सन खोप दिइरहेको छ ।
‘विदेश जानेहरु जसलाई जोन्सन एण्ड जोन्सन खोप लगाउनुपर्ने आवश्यकता परेको छ । उहाँहरुले पासपोर्ट र भिसा सहित गएर खोप लिन सक्नुहुन्छ ।’– काफ्लेले भने ।