काठमाडौँ । बंगलादेशको दक्षिणी जिल्ला झालाकाथीमा शुक्रबार एक नदीमा खचाखच भरिएको डुंगामा आगलागी हुँदा कम्तीमा ४० जनाको मृत्यु भएको प्रशासनले पुष्टि गरेको छ ।

ढाका त्रिवुनले दिएको जानकारीअनुसार धेरै यात्रुहरु जलेर गम्भीर घाइते भएकाले मृत्यु हुनेको संख्या बढ्ने सम्भावना रहेको छ । बारीसालको शेर–ए–बंगला मेडिकल कलेज एन्ड हस्पिटल (एसबिएमसीएच)का सहायक निर्देशक डा. मोनिरुज्जामानले भने, “जलेका ६६ मध्ये १८ जना महिला छन्, बाँकीको अवस्था पनि गम्भीर रहेको छ ।”

उनले थपे, “आगोमा जलेर गम्भीर घाइते भएका तीन जना महिला र चार जना पुरुषलाई स्थानीय अस्पतालमा उपचार सम्भव नभएपछि ढाका मेडिकल कलेज र अन्य अस्पतालहरूमा पठाइएको छ ।”

अग्नि नियन्त्रण सेवाका अधिकारीहरूले सञ्चार माध्यमलाई दिएको जानकारी अनुसार ७० जनाभन्दा बढी यात्रुहरू स्थानीय अस्पतालमा पठाइएको बताएका छन् । आगो इञ्जिन कोठाबाट सुरू भई मानिसहरू खचाखच भएका अन्य कक्षमा फैलिएको प्रारम्भिक अनुसन्धानले देखाएको उनीहरूले बताए ।

दापडापिया क्षेत्रमा पुग्दा बिहान ३ बजेको समयमा आगोको ज्वाला देखिएको र उक्त डुंगा झलाकाथी सदर उपजिल्लाको दियाकुल क्षेत्रमा गएर किनारमा अवतरण गराइएको थियो ।