कैलाली । प्रधानमन्त्री कप राष्ट्रिय महिला क्रिकेट प्रतियोगिताको उपाधि एफीएफले जितको छ । आइतबार भएको फाइनलमा प्रदेश एकलाई ७ विकेटले पराजित गर्दै एपिएफले उपाधि जितेको हो ।

फाप्ला क्रिकेट मैदान धनगढीमा भएको फाइनलमा प्रदेश एकले जितका लागि ६८ रनको सामान्य लक्ष्य दिएको थियो । उक्त लक्ष्य एपिएफले १४.२ ओभरमा ३ विकेट गुमाएर पुरा गर्‍यो । एपिएफको जितमा ममता चौधरी र ज्योती पाण्डेले चौथो विकेटका लागि ३३ रनको साझेदारी गरे । ज्योती ३९ बलमा ३६ रन बनाएर अविजित रहँदा उनलाई ममता चौधरीले २३ बलमा १९ रन बनाएर साथ दिएकी थिइन । त्यसअघि ओपनर इन्दु वर्मा ५, रोमा थापा ४ र राजमती ऐरी शुन्य रनमै आउट भएपनि पाण्डे र चौधरीले एपीएफलाई जित दिलाए ।

त्यसअघि टस हारेर पहिलो ब्याटिङ गरेको प्रदेश एकले निर्धारित २० ओभरमा ६ विकेट गुमाएर ६७ रनमात्र बनाउन सक्यो । प्रदेश एकका लागि कप्तान रुविना क्षेत्रीले ४६ बलमा ३ चौकाको सहयोगमा ३४ रन बनाउँदा थप दोहोरो रनको स्कोरका रुपमा अप्सरी बेगमको ११ रन रह्यो । अन्य कुनैपनि खेलाडीले दोहोरो रनको स्कोर बनाउन सकेनन्। पुरा ओभर खेलेपनि कुनैपनि ब्याटरले गतिलो स्कोर बनाउन नसक्दा प्रदेश एक कमजोर योगफलमा समेटिन बाध्य भयो।एपीएफका लागि सिता रानामगरले ३, रेखा रावलले २ र करुणा भण्डारीले १ विकेट लिए ।