काठमाडौं । नेकपा (माओवादी केन्द्र) ले राष्ट्रिय सभा सदस्यका लागि उम्मेदवारको टुंगो लगाएको छ । सत्ता गठवन्धन दलहरुसँग मिलेर चुनाव लडन लागेको माओवादीले १९ रिक्त स्थानमध्ये ५ वटा सिटमा उम्मेदवारी दिने भागवन्डा मिलेको थियो ।

माओवादी केन्द्रीय समितिको पहिलो वैठकले उम्मेदवार चयन गर्ने जिम्मा अध्यक्ष पुष्पकमल दाहाल प्रचण्डलाई दिएको थियो । सोही आधारमा प्रचण्डले सोमबार साँझ पार्टीको भागमा परेको ५ सिटमा उम्मेदवार तय गरेका हुन् ।

प्रचण्डका स्वकीय सचिव रमेश मल्लले अध्यक्षले उम्मेदवार टुंग्गो लगाईसकेको बताए । उनका अनुसार प्रदेश २ महिलामा उर्मिला अर्याल, गण्डकी अन्यमा सुरेश आले मगर, दलिततर्फ गोरखाका भरत सुनार, अपांगमा सुर्खेतका नरबहादुर विष्ट र सुदूरपश्चिम प्रदेश दलित कोटामा जगत पार्कीलाई उम्मेदवार बनाउने निर्णय माओवादीले गरेको छ ।

माघ १२ गते राष्ट्रिय सभाको निर्वाचन हुँदैछ । त्यसका लागि आज उम्मेदवार मनोनयन दर्ताका लागि निर्वाचन आयोगले कार्यतालिका बनाएको छ ।

सत्ता गठवन्धनले मिलेर चुनाव लडने गरी सोमबार सत्ता गठवन्धन दलको बैठक बसेर सिट भागवन्डा लगाएका थिए । जसमध्ये काग्रेसलाई ६, माओवादी र नेकपा एकीकृत समाजवादीलाई ५, ५ , जनता समाजवादीलाई २ र राष्टिय जनमोर्चालाई एउटा सिट दिने गरी भागवन्डा लगाएका थिए ।

सातै प्रदेशमा एक महिला, १ अन्य गरी २–२ जना, गण्डकी, लुम्बिनी र सुदूरपश्चिम प्रदेशबाट दलित १–१ जना, प्रदेश १ र कर्णाली प्रदेशबाट अपांगता वा अल्पसंख्यक भएका १–१ जनाका लागि निर्वाचन हुँदै छ ।