काठमाडौं । ३३ किलो सुन प्रकरणमा आरोपित भइ फरार रहेका रमेश उप्रेती पक्राउ परेका छन् । तस्करीका मुख्य नाइके भनिएका चुडामणि उप्रेती ‘गोेरे’ का भाई रमेश उप्रेतीलाई प्रहरीले त्रिभुवन अन्तर्राष्ट्रिय विमानस्थलबाट नियन्त्रणमा लिएको हो ।

मंगलबार दुबईबाट एयर अरेबियाको विमानमार्फत नेपाल आएका उनलाई प्रहरीले विमानस्थलबाटै नियन्त्रणमा लिएको हो । दुबईमा बस्दै आएका गोरेका भाई रमेश उप्रेतीमाथि उताबाट सुन नेपाल पठाउने गरेको आरोप लगाइएको छ ।

३३ केजी सुन हराएको जानकारी रमेशलाई पहिले नै भएको र गोरेले फोनबाट हराएको सुन खोजी भइरहेको समेत उनलाई जानकारी गराएको पनि अभियोगपत्रमा उल्लेख छ ।

तीन वर्षअघि नै उनलाई दुबई प्रहरीले नियन्त्रणमा लिएकोमा नेपाल प्रहरीले आवश्यक कागजपत्र उपलब्ध गराउन नसक्दा उनी छुटेका थिए । सुन प्रकरणका मुख्य योजनाकार भनिएका गोरेलाईसोनम शाक्यको हत्यासहितको अभियोगमा अदालतले जन्मकैद सजाय सुनाइसकेको छ ।