काठमाडौं । राष्ट्रियसभा सदस्य पदका लागि मनोनयन दर्तासँगै निर्वाचन आयोगले प्रतिनिधिसभाको बन्द सूचीमा रहेका ८ उम्मेदवारको नाम हटाएको छ ।

२०७४ सालमा सम्पन्न प्रतिनिधिसभा सदस्य समानुपातिक निर्वाचन प्रणालीतर्फ बन्दसूचीमा पेश भएका नेकपा (माओवादी केन्द्र)का चार, जनता समाजवादी पार्टीका २ तथा नेकपा एमाले र राष्ट्रिय जनमोर्चाको एक एक जनाको नाम निर्वाचन आयोगले बन्दसूचीबाट हटाएको छ ।

माओवादी केन्द्रका सुरेशकुमार आलेमगर, जगत पार्की, मुक्तिनारायण प्रधान र नारायणप्रसाद दाहालको नाम बन्दसूचीबाट हटाइएको छ ।

यस्तै, साविक संघीय समाजवादी फोरमबाट बन्दसूचीमा पेश भएको जनता समाजवादी पार्टीका प्रकाश अधिकारी र मोहम्मद खालिदको नाम पनि मंगलबार नै आयोगले बन्दसूचीबाट हटाएको छ ।

यसैगरी, नेकपा एमालेका सोनाम ग्याल्जेन शेर्पा र राष्ट्रिय जनमोर्चाका तुलप्रसाद विश्वकर्माको नाम पनि बन्दसूचीबाट हटाइएको निर्वाचन आयोगका शाखा अधिकृत नवराज विष्टले जानकारी दिए ।

राष्ट्रियसभा सदस्य पदका लागि उम्मेदवारी दर्ता गरिएपछि ती आठ जनाको प्रतिनिधिसभा समानुपातिक निर्वाचन प्रणालीतर्फको बन्दसूचीमा रहेको नाम हटाइएको निर्वाचन आयोगले जनाएको छ ।