काठमाडौं । नेकपा (माओवादी केन्द्र)को पदाधिकारी चयन अव राष्ट्रियसभा निर्वाचन पछि मात्र हुने भएको छ । अध्यक्ष वाहेक अन्य पदाधिकारी चयन नगरी वसेको माओवादी केन्द्रले पुस २५ को केन्द्रीय समिति बैठकबाट पदाधिकारी चयन गर्ने वताएको थियो ।
तर अन्तिम समयमा आएर माओवादी केन्द्रले पार्टीको केन्द्रीय समिति बैठक स्थगन गरेको छ ।

‘पर्सि २५ गते बोलाईएको केन्द्रीय समितिको बैठक हाललाई स्थगन गरिएको छ,’ माओवादी केन्द्रका केन्द्रीय कार्यालयका मुख्य सचिव श्रीराम ढकाल प्रशान्तले भने, -‘अर्काे वैठक अब कहिले भन्ने अहिले खुलेको छैन ।’

उनका अनुसार पार्टीको केन्द्रीय कार्यालयमा कार्यरत ५ जनामा कोभिड संक्रमण देखिएको र अन्य पार्टीको महाधिवेशनमा सहभागी १५ नेता विरामी परेकोले अहिलेलाई वैठक स्थगन गरिएको हो । अध्यक्ष प्रचण्डले पनि विहिवार देखि नै प्रत्यक्ष भेटघाट तथा वधाई र शुभाकमना लगायतका कार्यक्रम रोकेर वसेका छन् ।

विरामी १५ नेतामध्ये पनि ९ जनालाई कोरोना संक्रमण पुष्टि भएको माओवादीले जनाएको छ। केन्द्रीय समिति स्थगन र अर्काे मिति तय नभएको कारण अव केन्द्रीय समितिको वैठक राष्ट्रियसभाको चुनाव पछि मात्र हुन सक्ने सम्भावना रहेको माओवादीको केन्द्रीय कार्यालय स्रोतले बताएको छ । राष्ट्रियसभा चुनाव माघ १२ गतेका लागि तय भएको छ । पार्टीका केन्द्रीय नेताहरु उर्मिला अर्याल, सुरेश आलेमगर, जगत पार्की लगायतका केही नेताहरु अहिले चुनावका उम्मेदवार छन् ।

चुनावी तयारीमा पार्टी र यसका नेताहरु जुटनु पर्ने भएकोले पनि अव अर्काे केन्द्रीय कमिटिको वैठक चुनाव पछि मात्र हुने र त्यसपछि मात्र पदाधिकारी चयन हुने माओवादीले जनाएको छ ।

माओवादी केन्द्रको पुस ११ देखि १८ गतेसम्म चलेको महाधिवेशनले २ सय ३६ सदस्यीय केन्द्रिय समिति चयन गरेको छ । त्यसपछि पुस २० गते बसेको निर्वाचित केन्द्रिय समितिको पहिलो बैठकले पुष्पकमल दाहाल प्रचण्डलाई निर्विरोध अध्यक्ष निर्वाचित गरेको थियो । अन्य पदाधिकारी र थप विधान अनुसारको केन्द्रीय सदस्य चयन गर्न माओवादीले वाँकी नै छ ।