काठमाडौँ । केही दिनयता कोरोना संक्रमण उच्च भएपछि हरेक १२ वर्षमा लाग्ने काभ्रेको पनौतिस्थित मकर मेला एक साताअघि नै स्थगित भयो ।
१२ वर्षे मेला स्थगित गरिएपछि पनौति शनिवार माघे संक्रान्तिमा सुनसान देखिन्थ्यो । तर यता चितवन र तनहुँको संगमस्थल देवघाटधाममा भने शनिवार विहान स्नान गर्नेको उत्तिकै भीँड लाग्यो ।
आज माघ १ अर्थात् माघे संक्रान्ति । माघे सक्रान्तिका दिन विहानै नदीहरुमा स्नान गर्ने धार्मिक प्रचलन रहिआएको छ । देवघाटधाममा बिहान स्नान गर्नेको भीँड लागे पनि दिउँसो भने त्यत्तिको भीँड थिए ।
कोरोनाको संक्रमणको जोखिम बढेको भन्दै जिल्ला प्रशासन कार्यालय चितवनले माघे संक्रान्तिमा देवघाट जाने भक्तजनका प्रवेशमा रोक लगाएको थियो । प्रशासनको निर्देशनको वेवास्ता गर्दे भक्तजनको भीँड लागेको थियो ।
दिउँसो दाहसंस्कार गर्न आउनेको केही समूह मात्रै देखिएका छन् ।

यस्तै, थारु समुदायले माघे संक्रान्तिलाई नयाँ वर्षका रुपमा मनाउने गर्दछन् । यो समुदाय स्नान, दान, एवं खानपिन र रमाइलो गरेर माघी पर्व मनाउने गर्दै आएका छन् ।

सूर्य धनु राशीबाट मकर राशीमा प्रवेश गर्ने संक्रान्ति भएकाले आजका दिनलाई मकर संक्रान्ति पनि भनिन्छ । माघ १ गतेदेखि उत्तरायण शुरु हुने भएकाले दिनभन्दा रात छोटा हुँदै जान्छन् । धार्मिक मान्यताहरुका अनुसार उत्तरायण शुरु हुने दिनको स्नान, जप, तप, ध्यान साधना, दान आदिलाई पुण्यदायक मानिन्छ ।

आजको दिन पवित्र नदी एवं त्रिवेणीमा स्नान, जप, तप, ध्यान र दान गरी घ्यू, चाकु, तरुल एवं खिचडी खाने गरिन्छ । तरुललाई पुस मसान्तका दिन उसिनेर माघ १ गते खाने परम्परा छ ।

यी परिकारले जाडोमा न्यानो प्रदान गर्ने भएकाले चिसो समयमा पर्ने पर्वमा ताता परिकार खाने गरिएको हो । यी खानाले त्रिदोष नाश हुने धार्मिक विश्वास छ ।