काठमाडौं । सशस्त्र प्रहरी बलको एपीएफ क्लब प्रधानमन्त्री कप टी–२० राष्ट्रिय क्रिकेट प्रतियोगिता फाइनलमा प्रवेश गरेको छ ।

मंगलबार कीर्तिपुरस्थित त्रिवि क्रिकेट मैदानमा भएको खेलमा त्रिभुवन आर्मी क्लबलाई हराउँदै सशस्त्र उपाधि नजिक पुगेको हो ।

मंगलबारको खेलमा आर्मीलाई ४७ रनले पराजित गर्दै एपीएफ उपाधि नजिक पुगेको हो । एपीएफले दिएको २३१ रनको लक्ष्य पछ्याएको आर्मीले ९ विकेट क्षतिमा १८३ रन मात्रै जोड्न सक्यो ।

आर्मीका लागि राजेश पुलामीले २१ बलमा ३८ रन र भीम सार्कीले १९ बलमा ३५ रन जोडे । बलिङमा एपिएफका शरद भेषवाकरले ३ विकेट लिएका थिए । अभिनास बोहरा र भुवन कार्कीले २–२ विकेट लिए ।

पहिले ब्याटिङ गरेको एपीएफका लागि लोकेश बम, प्रदीप ऐरी र आसिफ शेखले तीनै जनाले अर्धशतक पार गरे ।

बमले १४ बलमा ७ छक्का र २ चौकाको मद्दतमा नटआउट ६६ रन जोडे भने एपिएफका लागि ओपनर प्रदीप ऐरीले नटआउट ५७ रन र आसिफ शेखले आसिफले ८४ रन जोडे ।

अब उपाधिका लागि एपिएफले नेपाल पुलिस क्लबसँग बुधबार प्रतिस्पर्धा गर्नेछ । पुलिसले पहिलो सेमिफाइनलमा बागमति प्रदेशलाई पराजित गरेको थियो ।