काठमाडौं । प्रमुख प्रतिपक्षी दल नेकपा एमालेले पार्टी र जनवर्गीय संगठनहरुका सवैजसो कार्यक्रम स्थगित गरेको छ । कोरोना भाइरस को महामारी पुनः बढेको सन्दर्भमलाई मध्यनजर गरेर उसले पार्टी र जनसङ्गठनका २५ जनाभन्दा बढी सहभागी हुने सबै प्रकारका सार्वजनिक कार्यक्रम स्थगन गरेको जनाएको छ ।

एमाले केन्द्रीय कार्यालयका सचिव डा भीष्मराज अधिकारीले पार्टीका प्रदेश र जिल्ला अध्यक्षलाई पत्राचार गर्दै त्यस्ता कार्यक्रम हाललाई स्थगित गर्न निर्देशन गरेका हुन् । अध्यक्ष केपी ओलीको निर्देशनमा सचिव अधिकारीले मतहातका पार्टी कमिटिलाई त्यस्तो सर्कुलर गरेका हुन् ।

कोभिड १९ को तेस्रो लहरसम्बन्धी नेपाल सरकारले जारी गरेको स्वास्थ्य प्रोटोकललाई ध्यानमा राखेर मातहतका पार्टीका कार्यालय सञ्चालन गर्न पनि अधिकारीले सर्कुलरमार्फत आग्रह गरेका छन् ।

पार्टीका आन्तरिक बैठक, भेला, छलफल जस्ता कार्यक्रम आवश्यक सतर्कता अपनाई आयोजना गर्न र स्थानीय नेता–कार्यकर्ता र जनप्रतिनिधिले महामारी विरुद्ध आवश्यक सतर्कता अपनाउँदै जनताको सेवामा सक्रिय रहन पनि एमालेले आग्रह गरेको छ ।

एमालेले यही माघभित्र सबै प्रदेशमा अधिवेशन र आगामी फागुन मसान्तभित्र जनसङ्गठनका महाधिवेशन सम्पन्न गर्ने कार्ययोजना बनाएको थियो । तर अव ति सवै कार्यक्रम प्रभाविन बनेको छ । गत पुस २३ गते हुन नसकेका जिल्ला अधिवेशनहरु करीब २० जिल्लाको अधिवेशन पनि पर सरेको छ ।