भक्तपुर । भक्तपुरमा मास्क नलगाइ हिडडुल गरेका १५२ जनालाई प्रशासनले कारबाही गरेको छ ।

जिल्ला प्रशासन कार्यालय भक्तपुरको टोलीले बुधबार अनुगमनका क्रममा उनीहरुलाई कारबाही गरेको हो ।

बुधबार प्रमुख जिल्ला अधिकारी रुद्रादेवी शर्माको संयोजकत्वमा सुरक्षा निकायका प्रमुखहरूले पूर्वी नाका साँगा, बजार क्षेत्र सूर्य विनायक चोक, राधे–राधे, दरबार स्क्वायर टौमणी लगायतका स्थानमा स्वास्थ्य मापदण्डको पालन भए नभएको अनुगमन गरेका थिए ।

बुधबार मात्र नेपाल प्रहरीले स्वास्थ्य मापदण्ड पुरा नगरी सञ्चालन गरिएका ठुला साना ५ सय गाडीलाई कारबाही गरेको प्रशासनले जानकारी दिएको छ । प्रशासनले सिट क्षमता भन्दा बढी यात्रु चढाउन पनि रोक लगाएको छ । सवारी चालक, सहचालक तथा यात्रुलाई स्वास्थ्य मापदण्ड अनिवार्य पालना गर्न प्रशासनले भनेको छ ।