काठमाडौं । अनलाइनमार्फत नेपालमा बसेर अमेरिकामा जुवा खेलाएको आरोपमा महानगरीय अपराध महाशाखाले काठमाडौँबाट १२ जनालाई पक्राउ गरेको छ ।

मोबाइल मार्फत एप्लिकेशन चलाएर अमेरिकामा जुवा खेलाएको अभियोगमा १२ जनालाई पक्राउ गरेको महानगरीय अपराध महाशाखाका प्रवक्ता प्रहरी उपरिक्षक (एसपी) कृष्ण प्रशाद कोइरालाले मेरोन्यूजलाई जानकारी दिए । कीर्तिपुर नगरपालिकास्थित चोभार, नगाउँ र बागभैरवस्थित विभिन्न घरहरूमा खानतलासी गरी अनलाइन जुवा खेलाइरहेको अवस्थामा उनीहरूलाई जुवा खेलाउन प्रयोग हुने ल्यापटप, मोबाइल लगायत उपकरणहरूसहित पक्राउ गरिएको प्रहरीले जनाएको छ ।

कोइरालाका अनुसार पक्राउ पर्नेमा कीर्तिपुर नगरपालिका ६ चोभार बस्ने ३३ वर्षीय सुजेन्द्र थापा, वडा नम्बर ६ बस्ने १७ वर्षीय मनिष थापा, १७ वर्षीय समिर थापा, २७ वर्षीय कविता थापा, ३० वर्षीय रविन खड्का, कीर्तिपुर वडा नम्बर १० बस्ने ४५ वर्षीय बुद्ध महर्जन, १९ वर्षीया हनिशा महर्जन, वडा नम्बर ८ बस्ने २० वर्षीया रोजा महर्जन र १९ वर्षीय साहिल महर्जन, वडा नम्बर ९ बस्ने ३५ वर्षीय प्रदीपमान सिंह बस्नेत, वडा नम्बर ५ बस्ने १९ वर्षीय विनोद ठगुन्ना र १७ वर्षीय रमादेवी श्रेष्ठ रहेका छन् ।

पक्राउ परेका उनीहरुले जुवा खेलाए वापत कमिसन पाउने गरेको एसपी कोइरालाले बताए । यस घटनाबारे थप अनुसन्धान जारी रहेको प्रहरीले जनाएको छ ।