काठमाडौँ । रात्रिकालीन ब्यवसाय एक साताभित्र सञ्चालन गर्न व्यावसायीहरूले सरकारलाई अल्टिमेटम दिएका छन् ।

शुक्रबार काठमाडौँमा पत्रकार सम्मेलन गर्दै व्यावसायीहरूले एकसाताभित्र स्वास्थ्य मापदण्ड अपनाएर सुरक्षित तरिकाले रात्रिकालीन व्यवसाय सञ्चालन गर्न नदिए आन्दोलन चर्काउने चेतावनी दिएका छन् ।

एक साताभित्र व्यवसाय सञ्चालन गर्न नदिए १ लाख व्यवसायी र ३ लाख मजदुरसहित सडक सङ्घर्षमा उत्रिने उनीहरुले चेतावनी दिएका छन् ।

पत्रकार सम्मेलनमा रात्रिकालीन मनोरञ्जन व्यवसायी संघको अध्यक्ष आशिष खड्काले सरकारले तत्काल व्यवसाय सञ्चालन गर्न नदिए सडकमा उत्रिन बाध्य हुने चेतावनी दिए ।

त्यस्तै, दोहोरी व्यवसायी संघको अध्यक्ष बिनोद श्रेष्ठले रात्रिकालीन व्यवसाय बन्द हुँदा कामदारहरूसमेत बेरोजगार हुनुपरेको भन्दै सरकारले अध्ययन नै नगरी यो व्यवसायलाई बन्द गराएको आरोप लगाए ।
सरकारको यस्तो निर्णयले सञ्चालक मात्र नभएर कार्यरत श्रमिकहरूसमेत मर्कामा परेको उनको भनाई थियो ।

यस्तै, अर्का रात्रि व्यवसायी केशरबहादुर बुढाथोकीले अन्य पेशा व्यवसायभन्दा बढी मर्कामा पर्ने रात्रिकालीन व्यवसाय भएकाले सरकारले यसलाई तत्कालै खुलाउन पहल गर्नुपर्नेमा जोड दिए ।