काठमाडौं । कोटेश्वर सहयोगी नगरमा डेमामालिनी शर्माको पसल छ । पसलमा होलीमा बिक्री गर्न भनेर ल्याइएको टिसर्ट, रङ तथा बेलुनको चाङ छ । तर २०७७ सालको होलीले बिदा माग्दै गर्दा उनको पसलबाट फट्टफुट्ट मात्र टिसर्ट, रङ र बेलुनको बिक्री भएको छ । होलीमा राम्रै व्यापार होला भनेर प्रशस्त सामान जोडेकी उनी व्यपार नभएपछि चिन्तित छिन् ।

कोटेश्वरकै रमेश कर्माचार्यको पसलमा ‘ह्याप्पी होली’ लेखिएका टिसर्ट टन्नै छन् । गतवर्ष उनले ह्याप्पी होली लेखिएको टिसर्ट राम्रै संख्यामा बिक्री गरेका थिए । तर यसवर्ष भने अहिलेसम्म जम्मा तीनवटा मात्र टिसर्ट बिक्री भएको उनको भनाइ छ । विगतमा व्यापारीले होलीमा राम्रै व्यापार गर्दथे ।

भक्तपुर गठ्ठाघरका रेवत कटुवाल विगत वर्षमा होली खेल्न घर बाहिर निस्कन्थे । तर यसवर्ष कोरोना संक्रमणको जोखिम बढ्ने भयले उनी घर बाहिर निस्केनन् । होलीका दिन मिठोमसिनो खाने नेपालीको चलन भए पनि उनको घरमा यसपटक त्यसको रौनक देखिएन । कारण होलीका दिन बढी भीडभाड हुने र त्यसले कोरोनाको जोखिम निम्त्याउने ।

यी त प्रतिनिधि उदाहरण मात्र हुन् । कोरोनाको त्रासकै बीच सर्वसाधारणले घरैभित्र परिवारजनमा सीमित रही यसवर्षको होली मनाएका छन् । जसका कारण होलीमा राम्रै व्यापार हुने सोचेका व्यवसायी मारमा परेका छन् । गतवर्षको तुलनामा व्यापार ह्वात्तै घटेको व्यवसायीको भनाइ छ ।

गतवर्ष चैतदेखिको लकडाउनले प्रताडित बनेका व्यापारी यसवर्ष पनि कोरोनाको त्रास कायमै रहनु, सर्वसाधारण घर बाहिर ननिस्कनुले व्यापार चौपट्ट भएको बताउँछन् । लकडाउन हटेसँगै सहजै व्यापार होला भन्ने आशमा रहेको व्यापारी होलीको व्यापार देखेर चिन्तित बनेका छन् । कोरोना विस्तारै कम हुँदै गएकामा केही आशावादी देखिएका व्यवसायी फेरि संक्रमण बढ्न थालेपछि तनावमा देखिन्छन् ।

बढी भीडभाड गर्दा कोरोनाको संक्रमण बढ्न सक्ने भएकाले सर्वसाधारणले उच्च सतर्कता अपनाएका छन् । सरकारले पनि घरभित्रै सीमित रही होली मनाउन सर्वसाधारणलाई आग्रह गरेको थियो । यसको मार उपत्यकासहित देशरभरको व्यापारमा परेको छ ।

चाडपर्वको समयमा व्यस्त देखिने कोटेश्वर, बानेश्वर, मंगलबजार, लगनखेल गठ्ठाघर, असन, इन्द्रचोक, न्यूरोडमा यसपाली खासै चहलपहल देखिएन । होलीका सामग्री बिक्री गर्न राखेका पसलमा ग्राहक देखिँदैनन् ।

होलीको रमाइलो हेर्न कोटेश्वर पुगेकी श्रृष्टि गुरुङले यसपटक विगत जस्तो रौनक नदेखिएको बताइन् । कुनै पनि पसलमा ग्राहक नदेख्दा साच्चै उनी पनि अचम्मित भइन् । कोरोनाको त्रासका कारण सर्वसाधारण घर बाहिर ननिस्केको हुन सक्ने उनको अनुमान छ ।