काठमाडौँ । ललितपुरका प्रमुख जिल्ला अधिकारी (सिडिओ) ढुण्डीप्रसाद निरौलालाई कोरोना भाइरस (कोभिड–१९) संक्रमण पुष्टि भएको छ । आफूलाई कोरोना संक्रमण भएको भन्दै उनी आज काठमाडौँ उपत्यकाका सिडिओहरूको बैठकमा सहभागी नहुने भएका छन् ।

बैकठमा सिडिओ निरौला भर्चुअल माध्यमबाट उपस्थित हुने छन् भने सहायक प्रमुख जिल्ला अधिकारीको बैठकमा सहभागिता हुनेछन् । उनी अहिले आइसोलेशनमा नै रहेका छन् ।

काठमाडौँ उपत्यकामा कोरोना भाइरस तीव्र गतिमा फैलिएको भन्दै आज रोकथाम तथा नियन्त्रणबारे थप निर्णय गर्न तीन जिल्लाका सिडिओहरुको बैठक बस्दैछ । जिल्ला प्रशासन कार्यालय काठमाडौंमा बस्ने बैठकमा पहिलो चरणमा जारी गरिएको निषेधाज्ञाको समीक्षा गरी आगामी रणनीतिबारे छलफल हुने भएको छ ।

उपत्यकामा कोरोनाको संक्रमणदर तीव्र बनेको भन्दै गत वैशाख १६ गतेदेखि बुधबार मध्यरातसम्म लागू हुने गरी निषेधाज्ञा जारी गरिएको छ । निषेधाज्ञाका लागि यसअघि नै मन्त्रिपरिषद् बैठकले मार्गप्रशस्त गरिसकेको छ ।