काठमाडौं । निषेधाज्ञा लागू गर्दा पनि कोरोना संक्रमण नघटेपछि जिल्ला प्रशासन कार्यालय काठमाडौँले आवातजावतलाई खुम्च्याउँदै थप कडाइ गरेको छ ।

अत्यावश्यक खाद्य सामग्रीको पसल, व्यवसाय र डिपाटमेन्टल स्टोर (खाद्य सामग्री मात्र बिक्री गर्ने प्रयोजनका लागि) बिहान ९ बजेसम्म खोल्न दिने निर्णय गरिएको काठमाडौँका प्रमुख जिल्ला अधिकारी कालिप्रसाद पराजुलीले जानकारी दिए ।

यसअघि खाद्य सामग्रीका पसल बिहान ७ देखि ९ र बेलुका ५ देखि ७ बजेसम्म सञ्चालन गर्न दिइएको थियो । अब बेलुका पसल खोल्न पाइनेछैन । यस्तै बैंक तथा वित्तीय संस्थाको हकमा काठमाडौँ उपत्यकामा २५ प्रतिशत शाखा कार्यालयमात्र खुल्ला गर्ने र केन्द्रीय कार्यालयले २० प्रतिशत मात्र जनशक्ति प्रयोग गरी कार्य सञ्चाल गर्ने व्यवस्था मिलाउन पनि प्रशासनले निर्देशन दिएको छ ।

यसअघि एक साताका लागि लगाइएको निषेधाज्ञाको समय बढाएर यही वैशाख २९ सम्म पुर्याइएको छ । संक्रमण बढेपछि उपत्यकामा यही वैशाख १६ गतेदेखि एक साताका लागि निषेधाज्ञा लगाइएको थियो ।