काठमाडौं । कोरोना संक्रमितको उपचारको लागि प्रयोग गरिने रेम्डिसिभिर औषधिको कालोबजारी गरेको अभियोगमा एक जना पक्राउ परेका छन् ।

महानगरीय अपराध महाशाखाले बिहिबार गोरखाको आरुघाट गाउँपालिका–४ घर भई काठमाडौंको टोखा बस्ने २५ वर्षीय रफिक मियालाई पक्राउ गरेको हो ।

६ थान रेम्डिसिभिर औषधिको करिब ३० हजार मूल्य पर्नेमा १ लाख २० हजार रुपैयाँमा बिक्री गर्ने भन्दै बार्गेनिङ गरेर बसुन्धरामा बिक्री गर्न आएको अवस्थामा मियालाई पक्राउ गरिएको महानगरीय अपराध महाशाखाले जनाएको छ ।

पक्राउ परेका मियाले आफूलाई त्रिवि शिक्षण अस्पताल अगाडि निलकण्ड लम्सालको नाममा दर्ता रहेको सेवक फर्माका दीपक ढकालले रेम्डिसिभिर बेच्न लगाएको प्रहरीसँगको बयानमा बताएका छन् । फर्माका ढकाल हाल फरार रहेकाले खोजी भइरहेको महाशाखाले जनाएको छ ।

उनलाई संक्रामक रोग नियन्त्रण ऐन, कालोबजारी ऐनअनुसार कारवाही प्रक्रिया अगाडि बढाइएको महानगरी अपराध महाशाखाले जनाएको छ ।