काठमाडौँ । प्रधानमन्त्री केपी शर्मा ओलीले घरमै रहेर सुरक्षित तवरले चाडपर्व मनाउन आह्वान गरेका छन् । इस्लाम समुदायको पवित्र पर्व इदुल फित्रको अवसरमा शुभकामना दिँदै उनले विशेष परिस्थितिमा घरमै रहेर सुरक्षित तवरले चाडपर्व मनाउन आह्वान गरेका हुन् ।

‘विगत डेढ वर्षदेखि हामी विश्वव्यापी संकटका रुपमा कोरोना भाइरस (कोभिड-१९) भाइरसको महामारी सामना गरिरहेका छौँ,’ उनले भने, ‘महामारीलाई रोक्ने हाम्रो अथक प्रयत्नका बावजुद यस महाव्याधिका कारण धेरै दिदीबहिनी दाजुभाइहरुले ज्यान गुमाइसक्नु भएको छ ।’

ओलीले नेपाल बहुधार्मिक, बहुजातीय, बहुभाषिक र बहुसांस्कृतिक विशेषतायुक्त सुन्दर देश भएको भन्दै यस्ता विशेषताहरु मौलिक पुँजीको रुपमा रहेको बताएका छन् । आलीले एकता र सहिष्णुताको यस पुँजीलाई हामीले समृद्ध देश निर्माणमा सदुपयोग गर्नु पर्ने बताए ।

‘विभिन्न धर्म र संस्कृतिमा आधारित यस्ता पर्वहरु हाम्रो राष्ट्रिय एकता, पारस्परिक सद्भाव र सहिष्णुताका मौलिक पहिचान हुन्,’ ओलीले भने, ‘लोकतन्त्र, सामाजिक न्याय, राष्ट्रिय एकता, स्वाधीनता, राष्ट्रिय अखण्डता र देशभक्तिलाई केन्द्रमा राख्दै कायम गरिने अक्षुण्ण एकता, सद्भाव र सहिष्णुता हाम्रो राष्ट्रिय विशेषता भएको छ ।’

सन्देशमा ओलीले विभिन्न धार्मिक तथा सांस्कृतिक आस्थाहरु यस देशमा सम्मानित र संरक्षित छन् । उनले समृद्ध नेपाल-सुखी नेपालीको राष्ट्रिय आकांक्षा पूरा गर्ने अभियानमा आफूहरु लागेको बताएका छन् ।