काठमाडौँ । प्रधानमन्त्री केपी शर्मा ओलीले प्रतिनिधि सभा जीवितै रहेको बताएका छन् । नेकपा एमालेका अध्यक्षसमेत रहेका प्रधानमन्त्री ओलीले अध्यादेशबाट बजेट नआउने संकेत दिँदै यस्तो बताएका हुन् ।

अध्यक्ष ओली र नेता माधवकुमार नेपालबीच सिंहदरबारमा भएको वार्तापछि पत्रकारसँग कुरा गर्दै उनले प्रतिनिधि सभा जीवितै रहेकाले अध्यादेशबाट बजेट नआउने बताए । पत्रकारको प्रश्नमा ओलीले पार्टीमा देखिएका विवाद समाधान हुने बताए । उनले पार्टीमा देखिएको विवाद समाधान भएकाले अब पार्टी मिल्ने बताएका थिए ।

एमालेका दुई नेताबीच भएको आजको वार्ताले पार्टीमा देखिएको विवाद मिलाउन १० नेताबीचको कार्यदल गठन गरिएको छ । कार्यदलमा ओली पक्षबाट सुवास नेम्वाङको नेतृत्वमा विष्णु पौडेल, प्रदीप ज्ञवाली, शंकर पोखरेल र विष्णु रिमाल रहेका छन् ।

यस्तै, नेपाल समूहबाट भीम रावलको नेतृत्वमा घनश्याम भुसाल, गोकर्ण विष्ट, सुरेन्द्र पाण्डे र रघुजी पन्त रहेका छन् । उक्त कार्यदलले तीन दिनभित्र प्रतिवेदन बुझानु पर्ने नेता नेपालले बताएका छन् ।