काठमाडौं । राष्ट्रपति विद्यादेवी भण्डारीले प्रधानमन्त्रीका लागि दावी परेका दुवै नेता केपी ओली र शेरवहादुर देउवा दुवैको दावी नपुगेको भन्दै निर्णय लिएपछि सत्तापक्षिय एमालेका नेताहरुले खुसी मनाउन थालेका छन भने विपक्षी गठवन्धनका नेताहरुले आक्रोश पोख्न थालेका छन् । माओवादी केन्द्रका नेता वर्षमान पुनले मध्यरात डकैती गरिएको टिप्पणी गरेका छन् ।

राष्टपतिवाट आएको त्यस्तो निर्णयलाई उनले सामाजिक सन्जालमार्फत मध्यरातको डकैती को संज्ञा दिएका हुन् ।
उनले सामाजिक सन्जालमा लेखेका छन्, – मध्यरातमा डकैती गरियो / ज्ञानेन्द्र शाहले पनि शुक्रबार / मध्यरात नै रोज्ने गर्थे ।

त्यस्तै, नेपाली काँग्रेसका नेता रमेश लेखकले राष्ट्रपतीले संविधान च्यात्ने काम गरेको बताए । उनले भने, – हाम्रो दाबी पुगेको थियो। दाबी पुगेन भन्नु संविधान च्यात्ने काम हो।

यसैबीच प्रधानमन्त्रीको सरकारी निवास बालुवाटारमा मन्त्रिपरिषदको आकस्मिक बैठक बसिरहेको छ । पराराष्ट्र मन्त्री प्रदीप ज्ञवालीले केहीबेरमा बैठक सुरु हुने जानकारी दिए । तर, बैठकका एजेन्डाबारे आफू जानकार नरहेको मन्त्री ज्ञवालीले बताए ।