काठमाडौं । कुस्तीवाज सागर धनकरको हत्या गरेको अभियोगमा ओलम्पियन कुस्तिवाज सुशील कुमार सहित २ जना पक्राउ परेका छन् ।

जालान्धरको नजिकबाट ओलम्पिकमा दुई पटकको पदक विजेत भारतीय कुस्तिवाज सुशील कुमार र अर्का आरोपी अजय कुमारलाई पनि पक्राउ गरिएको भारतीय सञ्चारमाध्यमले जनाएको छ ।

दिल्ली सेसन्स कोर्टले ओलम्पिकमा दुई पदक हात पारेका भारतीय कुस्ती खेलाडी सुशील कुमारको ‘एन्टिसिपरी बेल’ को निवेदन खारेज गरिदिएको थियो। २३ वर्षे अर्का कुस्ती खेलाडीको हत्याको आरोप लागेका उनलाई अदालतले पक्राउ हुनुपूर्व अग्रिम जमानत दिन अस्वीकार गरेको थियो ।

कुमारले भने आफूमाथि लागेको आरोप ‘निराधार, मिथ्या र निरर्थक’ भएको बताएका छन्। अदालतले उनीमाथि लागेको आरोप गम्भीर भएको र प्रमाणहरु पनि बलिया भएकाले जमानत दिन अस्वीकार गरेको भारतीय सञ्चारमाध्यमहरुले जनाएका छन् ।

सोमवार सुशील कुमार फरार भएको भन्दै दिल्ली पुलिसले उनीमाथि १ लाखको पुरस्कारसमेत राखेको थियो । दिल्ली पुलिसले माडल टाउनस्थित छत्रसाल स्टेडियममा पहलवान सागर धनगढको हत्या प्रकरणका मुख्य आरोपी सुशील कुमारमाथि सोमवार १ लाख पुरस्कार राखेको थियो। त्यस्तै उनका सहयोगी अजयमाथि ५० हजारको पुरस्कार राखिएको थियो। यो प्रकरणमा सुशीलसहित ९ जना फरार भएको बताइएको छ ।

रेस्लिङ च्याम्पियनको हत्या
दुई हप्ता अगाडि जुनियर नेसनल रेस्लिङ च्याम्पियन सागर रानाको हत्या भएको थियो। मे ४ मा केही घाइते रेस्लरहरु अस्पताल भर्ना भएका थिए जसमा १ जनाको निधन भएको थियो। र, यो प्रकरण सतहमा आएको थियो । मे ५ मा सुशीलले आफूमाथि लागेको आरोप अस्वीकार गर्दै आफू र आफ्नो रेस्लरहरु त्यसमा सहभागी नभएको दाबी गरेका थिए ।