इरानले जारी युद्धमा दोस्रो अमेरिकी एफ-३५ लडाकू विमान खसालेको दाबी गरेको छ।

इरानले दोस्रो एफ-३५ लडाकू विमानलाई ‘इस्लामिक रिभोलुसनरी गार्ड कोर्स’ (आइआरजीसी) को ‘एयर डिफेन्स’ प्रणालीले मध्य इरानमा खसालेको दाबी गरेको छ।

इरानको सरकारी समाचार एजेन्सी तस्निमले सो विमानका केही टुक्राहरूका तस्बिर सार्वजनिक गरेको छ ।

गत महिना पनि इरानले एउटा एफ-३५ लडाकू विमान खसालेको दाबी गरेको थियो। पछि अमेरिकी सेनाले एक विज्ञप्ति जारी गर्दै इरानमाथि आक्रमण गर्ने क्रममा एउटा एफ-३५ लडाकू विमानले आपतकालीन अवतरण गरेको बताएको थियो। उक्त जेटका पाइलटको अवस्था स्थिर रहेको सेनाले जानकारी दिएको थियो।

इरानले दोस्रो एफ-३५ लडाकू विमान खसालेको बारे अमेरिकाले अहिलेसम्म कुनै प्रतिक्रिया दिएको छैन।