काठमाडौं । नेपाल कम्युनिष्ट पार्टीका महासचिव नेत्रविक्रम चन्दले प्रधानमन्त्री केपी ओली नेतृत्वको सरकारलाई चेतावनी दिएको छ । गत फागुन २१ मा ओली नेतृत्वको सरकारसँग ३ वुदे सम्झौता गरेर सार्वजनिक भएका विप्लवले त्यसयता पहिलो पटक ओली नेतृत्वको सरकारलाई चेतावनी दिएका हुन् ।

उनले सरकारले ल्याएको नागरिकता अध्यादेशका विषयमा पार्टीको गम्भिर ब्यानाकर्षण भएको भन्दै त्यस्तो निर्णय खारेज गर्न चेतावनी दिएका हुन् । सोमबार विज्ञेप्ती जारी गदै विप्लवले नागरिकताजस्तो राष्ट्रिय महत्व एवम् जनसरोकारका विषयमा निर्णय लिँदा जनमतलाई बुझ्न र विज्ञहरूको व्यापक परामर्श लिन आवश्यक रहेको बताएका छन् ।

उनले वक्तब्यमा भनेका छन्,–‘त्यसो गर्नुको सट्टा सरकारले आफ्नो सत्तासङ्कट टार्न, कुर्सी जोगाउन र कसैलाई खुसी पार्नका लागि मात्र यस्ता निर्णय लिन्छ भने त्यसको मूल्य सिङ्गो देशले चुकाउनुपर्ने हुन्छ । अतः हाम्रो पार्टी त्यस्ता राष्ट्रहितविपरीत कार्य नहोऊन्, त्यस्ता निर्णय खारेज गरिऊन् भन्ने चेतावनी केपी ओली सरकारलाई दिन चाहन्छ ।’

संविधान जारी गर्दा नै नागरिकतासम्बन्धी कैयौँ गलत एवम् त्रुटिपूर्ण प्रावाधानहरू रहेकोबारे आफुहरुले विरोध जनाएको स्मरण गदै उनले हरेक नेपाली नागरिकले सहज ढङ्गले आफ्नो देशको नागरिकता पाउनु उसको जन्मसिद्ध अधिकार हो र त्यो सुविधा पाउनुपर्छ भन्ने पार्टी धारणा रहेको पनि प्रष्टाएका छन् ।