काठमाडौं । ललितपुर महानगरपालिका वडा नम्बर १० बाट इन्टरनेट हेरेर स्यानिटाइजर बनाइरहेका एक जना पक्राउ परेका छन् ।

सोमबार विशेष सूचनाका आधारमा खटिएको महानगरीय अपराध महाशाखाको टोलीले बुटवल उपमहानगरपालिका १३ घर भई ललितपुर बस्ने २३ वर्षीय दुर्गा भट्टराईलाई पक्राउ गरेको हो ।

दर्ता नै नगरी इन्टरनेटमा हेरेर दुई(चार जना कामदार राखेर मापदण्डविपरीत स्यानिटाइजर बनाउने गरेको महानगरीय अपराध महाशाखाले जनाएको छ ।

महाशाखाका अनुसार पक्राउ परेका भट्टराइले इन्टरनेटबाट स्यानिटाइजर बनाउन र लेबल पनि इन्टरनेटमा हेरेर आफैं राखेका थिए । यद्यपी भट्टराईले अहिलेसम्म सो स्यानिटाइजर बजारमा पठाइसकेको छैन ।

प्रहरीले भट्टराईको साथबाट करिब १५ हजार लिटर तयारी अवस्थामा रहेको स्यानिटाइजर फेला पारेका छन् ।